Cajón de sastre, escritos, pensamientos, reivindicaciones...

Meto istas ringleras que fazié fa muito tiempo d´o puen d´a Gorgocha, a belún o beluna le´n parexerá que estarba millor clamarla "A aburruzión d´os camelidos", pero miaquemexió,

 astí lo clabo pa beyer si perdemos a bergueña. Si bos cuaca diziz lo me. Pos ixo...  

Puen engaronau d´a Gorgocha

-Baxo lo entibo d´A Peña-.

Te debantón ta cutio estar firme

trango entre esbarres y camíns,

entre peñas y tozals ubrioron

os tuyos zelestes güellos bataleros,

y prebando d´acarrazar perén

o firme esbarizar d´as auguas,

te i ficón sobre os zaguers gorgollos,

guitando carrañosos ent´o llano.

Astí yeras, piedra, aire y río, penchau

en a ralla, amanando pirinencos Reinos,

paso zeleste t´o tramenar de chens,

de trinos, d´o bater d´as auguas de un libre Galligo.

Agora penas ya un ziento d´añadas

engarcholau por auguas  contenitas,

baxo un manto quedo como de un mar

que dica o fundo te´n capuzó ta un fundo

de peñas enarcadas como grisos corales,

de calizas anguniatas… enzerrine de piedras bi yes

por alzar-sen  en l´orden d´o  suyo primer día.

Aconortau entre as mesmas auguas

que baxo os tuyos güellos estioron río

ya no sabes si talmén sólo bi yes

laminau canto de glera que l´agua empenta.

Embalsamau de xublius con bardos

de soledat chipios de silenzios,

sin de biellos camins ni estrelas

que penchen d´o tuyo zielo capuziau,

en o fundo d´a Gorgocha chuntando

por demás dos afogadas riberas bi yes,

barau en a tuya fosca placha de tarquíns

an se quera o tuyo zerrín esquinazo.

Cosa astí indica o puesto d´o tuyo espazio y tiempo

no guaire remerau, ni una sayeta cara ta baxo enta res

metendo o tuyo nombre cuasi trafegau.

Acucuta de nuebas zereño y espectral

sobre o tuyo feble río sulsíu,

naufrago d´o tiempo ixuga os tuyos

güesos de piedra a la sequera del´estíu,

y  malas que no bi aiga augua que soltar

y t´esterreñes d´as zagueras nieus,

amuestra-nos-te como una laquia

ta que penemos o tuyo chopizo desamparo.

Beluns lamentarán o tuyo esdebenidero

reblar como un natural beredito d´o tiempo,

atamás d´ers unatra begada no estarbas paisache,

pero asti bi yes, enguiliando os ibiernos.

Baxo istas auguas d´o Galligo aquí de nuebas

aturadas, sin sisquiá ni tartir, escansa a o silenzio

d´a Istoria mesmo que de tantismas d´as nuestras

iistorias un puen meyebal an auguas y chens yeran bida

fendo cadagún o suyo camín, con tu dixo istas parolas

como bolandrinas o carpuzes o zapos ta dizir que astí bi yes.

Llano de grano y polbo, de panizo berde y  guiñote,

asfaltes, zequias y hortals, indiferén a o fundo

craquelato d´os tuyos montesinos mares d´o norte.